‘కన్నప్ప’గా మంచు విష్ణు వంద శాతం న్యాయం చేశారు: ముఖేశ్ కుమార్ సింగ్

టాలీవుడ్ డైనమిక్ హీరో మంచు విష్ణు ప్రతిష్ఠాత్మకంగా నిర్మిస్తూ, నటిస్తున్న ‘కన్నప్ప’ చిత్రం జూన్ 27న ప్రేక్షకుల ముందుకు రానుంది. అవా ఎంటర్టైన్మెంట్, 24 ఫ్రేమ్స్ ఫ్యాక్టరీ పతాకాలపై మోహన్ బాబు నిర్మిస్తున్న ఈ చిత్రానికి ముఖేశ్ కుమార్ సింగ్ దర్శకత్వం వహించారు. విడుదల తేదీ సమీపిస్తున్న తరుణంలో చిత్ర యూనిట్ ప్రమోషన్ కార్యక్రమాలను వేగవంతం చేసింది. ఈ సందర్భంగా దర్శకుడు ముఖేశ్ కుమార్ సింగ్ మీడియాతో మాట్లాడుతూ పలు ఆసక్తికర విషయాలను పంచుకున్నారు.

విష్ణు నమ్మకమే నన్ను ఇక్కడికి తెచ్చింది
మొదట విష్ణు బృందం నుంచి తనకు ఫోన్ వచ్చిందని, అయితే తాను ‘మహాభారతం’ సీరియల్‌కు కొంత భాగం మాత్రమే దర్శకత్వం వహించానని, ఇతర దర్శకులు కూడా ఉన్నారని వారికి చెప్పినట్లు ముఖేశ్ కుమార్ సింగ్ తెలిపారు. కొంతకాలం తర్వాత, ‘ఆచారి అమెరికా యాత్ర’ సినిమా నటుడు అనూప్ సింగ్ ఠాకూర్ ద్వారా విష్ణు తన గురించి మళ్లీ తెలుసుకుని సంప్రదించారని అన్నారు. "విష్ణు నన్ను హైదరాబాద్ రమ్మన్నారు. ఇక్కడికి వచ్చాక మూడు, నాలుగు గంటల పాటు చర్చించుకున్నాం. అప్పటివరకు కన్నప్ప గురించి నాకు పెద్దగా తెలియదు. విష్ణు కథ చెప్పిన తర్వాత చాలా పరిశోధన చేశాను. తర్వాత మోహన్ బాబు గారు పిలిచి ‘మహాభారతం’ సీరియల్ గురించి గంటసేపు మాట్లాడారు. అప్పుడే ఈ ప్రాజెక్ట్‌ ఫైనల్ అయింది" అని ముఖేశ్ వివరించారు.

అంతర్జాతీయ స్థాయి అనుభవం
తాను బుల్లితెరపై చేసినవన్నీ భారీ బడ్జెట్ ప్రాజెక్టులేనని, ‘మహాభారతం’ సీరియల్‌ను రూ. 200 కోట్లతో తీశామని ముఖేశ్ కుమార్ సింగ్ గుర్తుచేశారు. "నాకు సినిమాలు కొత్తేమీ కాదు. గతంలో అంతర్జాతీయ సంస్థలతో కలిసి ఆంగ్ల చిత్రాలు నిర్మించాను. బుల్లితెరైనా, వెండితెరైనా ఒకే అంకితభావంతో పనిచేస్తాను" అని ఆయన స్పష్టం చేశారు.

నటీనటులు, సాంకేతిక బృందం అంకితభావం
‘కన్నప్ప’ కోసం ప్రతి ఒక్కరూ అద్భుతంగా పనిచేశారని, వారి అంకితభావం వల్లే తన పని సులువైందని దర్శకుడు కొనియాడారు. "అక్షయ్ సర్, మోహన్‌లాల్ సర్, ప్రభాస్ సర్, మోహన్ బాబు గారు, విష్ణు గారు, బ్రహ్మానందం గారు.. ఇలా అందరితో పనిచేయడం మర్చిపోలేని అనుభూతి. మోహన్ బాబు గారు ఈ వయసులోనూ ఎంతో ప్యాషన్‌తో పనిచేశారు. నిర్మాతగా ఒకలా, నటుడిగా మరోలా కనిపించేవారు" అని ముఖేశ్ సింగ్ తెలిపారు.

కన్నప్పగా విష్ణు అద్భుత నటన
గతంలో కన్నడ, తెలుగు, హిందీ భాషల్లో కన్నప్పపై వచ్చిన చిత్రాలన్నింటినీ చూశానని, తాను కూడా వాటికి న్యాయం చేయాలనుకున్నానని ముఖేశ్ కుమార్ సింగ్ పేర్కొన్నారు. "విష్ణు గారు కన్నప్ప పాత్రకు వంద శాతం న్యాయం చేశారు. సినిమా చివరి గంట అద్భుతంగా ఉంటుంది" అని ఆయన ధీమా వ్యక్తం చేశారు. రెండో శతాబ్దం నాటి వాతావరణాన్ని తెరపైకి తీసుకురావడానికి ఆర్ట్ డైరెక్టర్ ఎంతో పరిశోధన చేశారని, ఎన్నో మ్యూజియంలు సందర్శించారని, ఆయుధాలు, దుస్తులపై ప్రత్యేక శ్రద్ధ తీసుకున్నామని, అందుకే న్యూజిలాండ్‌లో చిత్రీకరణ జరిపామని వివరించారు.

ప్రభాస్ పాత్ర పవర్‌ఫుల్
సినిమాలో ప్రభాస్ పాత్ర ఎంతో శక్తివంతంగా ఉంటుందని, ఏ పాత్ర కూడా అలా వచ్చి ఇలా వెళ్లేలా ఉండదని ముఖేశ్ సింగ్ తెలిపారు. "అన్ని పాత్రలు ప్రేక్షకులపై కచ్చితంగా ప్రభావాన్ని చూపిస్తాయి. ఏ అభిమాని కూడా ఈ సినిమా చూసి నిరాశ చెందరు. ఇప్పటికే చాలా మందికి ఈ సినిమాను చూపించాం. అందరూ అద్భుతంగా ఉందని ప్రశంసించారు" అని ఆయన అన్నారు.

కన్నప్ప వాస్తవ చరిత్ర... కల్పన కాదు
కన్నప్ప కథలో కొంత కల్పిత అంశాలు చేర్చినప్పటికీ, ఇది మన చరిత్ర అని, పురాణం కాదని ముఖేశ్ సింగ్ స్పష్టం చేశారు. "ఇంతకుముందు వచ్చిన కన్నప్ప సినిమాల్లో కూడా కొంత స్వేచ్ఛ తీసుకున్నారు. ఇందులో కూడా కొంత ఫిక్షనల్ పార్ట్ ఉంటుంది. మొదటి సన్నివేశం నుంచి చివరి సన్నివేశం వరకు అన్నీ ఒకదానితో ఒకటి ముడిపడి ఉంటాయి. శ్రీకాళహస్తి అర్చకులకు ఈ సినిమా చూపించాం. వారు సినిమా చూసి అద్భుతంగా ఉందని మెచ్చుకున్నారు. రెండో భాగం ఎప్పుడు వస్తుందని అడిగారు" అని ఆయన చెప్పారు. కన్నప్ప నిజంగా జీవించాడని, శివుడికి తన కన్ను సమర్పించడం మన చరిత్రలో భాగమని ఆయన అభిప్రాయపడ్డారు.

భవిష్యత్తులో ‘మహాభారతం’ను సినిమాగా తీయాలనే ఆలోచన ఉందని, అది పబ్లిక్ డొమైన్‌లో ఉన్న కథ కాబట్టి ఎవరైనా తీయవచ్చని ముఖేశ్ కుమార్ సింగ్ తెలిపారు.